車 - Volkswagen 1500

受台灣朋友所托，今朝一早去尖沙咀買J字頭曲奇餅。開心唔係因為好少人排隊，而係我泊左架車係K商場有意外發現。

Facebook album for Volkswagen 1500

各位觀眾，野生補獲1963年嘅Volkswagen 1500 (Wagon版本)。部車好靚好吸引，佢嚟左香港一年。四條胎就藏係load底左嘅車身入面，尾胎仲玩埋外八字。型！

真係好想睇佢係街行緊嘅英姿。

今日無時間等車主出現，唯有下次去K商場泊車，睇下會唔會再見到啦！

自駕遊 - Kodak Pixpro SP360 (2)

好多謝Kodak PIXPRO嘅facebook page分享左我拍攝嘅影片同博客，我自己個facebook page人數都上升左。

Youtube影片: Kodak PIXPRO SP360 影片 - 迴旋處的巴士

Youtube影片: Kodak PIXPRO SP360 - 青山公路

今次用SP360拍左兩條片，感覺要有好嘅效果除左硬件要好之外，事後剪輯都好緊要。大家見到我條片長度係一兩分鐘，但背後剪輯我係用左好多倍時間去整。搵音樂同每一段落嘅次序，我自己會睇好多次。首要係我自己睇完要唔覺得悶，我先會upload出街比大家睇。

嚟緊會一有時間就盡量出去拍多啲片，比大家感受下用SP360拍出嘅環境會係點。

自駕遊 - Kodak Pixpro SP360 (1)

仲有一個月就出發自駕遊，出發之前要好好熟習一下啲新玩具。

Facebook Page: Eddiemartin Driving Tour

目前嚟講比較多人用GoPro拍片，但我就買左呢部Kodak Pixpro SP360。貪佢機仔細細，而且係360度環迴拍攝，比起一般action cam呢一部嘅拍攝角度係無敵。﹝起碼而家係無敵，將來唔知。﹞

Youtube影片: Kodak Pixpro SP360 - Hongkong

近近地走左去屋企附近拍攝，用跟機吸盤配件將部機放係車頂。由於我係第一次玩，所以為左部機嘅安全我係吸盤上面再貼上大量電線膠布固定。

呢幾日天氣都麻麻，拍攝當晚就落住牛毛雨﹝「牛毛雨」呢個名稱睇怕八九十後都唔明，你地自己上網查啦！﹞，但就勝在條路唔多車。

【只要係Youtube搜尋sp360 hongkong，就會見到我拍嘅影片啦！簡單又方便。】

拍完之後用跟機個軟件就可以做初步嘅剪輯，有留意都知呢部機有多個playback mode。原來只要拍攝一次，一個file就已經有齊360全景、二分割、四分割、球形、方形、環形、半球形，用佢個軟件就可以根據不同模式分開儲存。

講明呀！部機我係自己出錢買，呢個唔係廣告。其實我都想有人贊助下，就好啦！ ^^