自駕遊 - 澳洲(9) 離地玩意

自駕遊 - 澳洲(9) 離地玩意

Facebook Page:  http://www.facebook.com/drivingtour

想知道離地嘅咩感覺，就要去Illawarra Fly Treetop Adventures玩下。澳洲最高滑翔索道(Highest Zipline Tour)，離開樹頂35-50米。整個tour由三條索道同兩條吊橋組成，大約1個小時完成。每一關之間會有一個半空嘅等候位置，人企係幾十米半空都幾驚下。

第一關

幾十米半空行吊橋，又係另一個挑戰，但驚還驚我都唔可以行得太慢，唔好阻住係我後面嘅團友。

行吊橋

最緊張係第四關嘅索道，呢個距離最遠，如果唔夠衝力去到終點就要由教練拉過去。臨飛出去前工作人員教路，叫我盡量瞓底啲，咁就可以加快速度。好彩，我都剛好到達終點，唔駛比人拉埋去。

距離最遠

玩完啱啱好中午時間，開車去Kiama食午餐。由Illawarra去Kiama Blowhole只需要30分鐘，但呢30分鐘就將我曬傷啦！鬼咩！貪過癮，開住蓬去Kiama。中午時間，唔曬傷先奇。

縮時攝影

加多少少幻想，我好似開緊多啦A夢時光機。

Kiama Blowhole係一個出名景點，旅行團都會嚟睇。所以整個市面都好多人，要搵地方食嘢都唔係容易。睇Blowhole之餘大家可以沿著石灘一路行去崖邊，石頭都好崎嶇而且無明顯嘅路，都係靠自己亂行出嚟！咁除左blowhole市面上都有其他嘢睇。有畫展，有玩具店，食嘢就有海鮮店。

Kiama Blowhole

其實澳洲每一個小鎮都好值得去細味，今次只有幾個小時係Kiama，希望有機會再嚟啦！

自駕遊 - 澳洲(8) 軍事博物館

自駕遊 - 澳洲(8) 軍事博物館 

Facebook: http://www.facebook.com/drivingtour

開車只需要半個鐘，就由袋鼠谷到達Nowra。嚟到Nowra就要去佢個軍事博物館睇睇，Fleet Air Arm Museum入面主要展覽戰機和直昇機，另外有紀念品店同咖啡店。展館好大而且好少遊客，可以比我一個人慢慢係到睇。

Fleet Air Arm Museum 海軍航空兵博物館 Part 1

Fleet Air Arm Museum 海軍航空兵博物館 Part 2

Fleet Air Arm Museum 海軍航空兵博物館 Part 3

行完博物館肚餓啦！係時候去食晚餐。Perfect Catch Seafood & Takeaway位於Shoalhaven River同Nowra Bridge旁邊，環境都算幾好。我比較喜歡搜尋係社區入面嘅魚市場，因為通常價錢都會比較平，所有我到而家都未去過Sydney市區嘅漁人碼頭。

點左一打生蠔同炸左一條魚，就可以坐係露天地方食啦！係澳洲戶外食海鮮，會有好多人同你爭食，我講嘅人係指海鷗同蒼蠅

食海鮮

係小鎮食完晚飯，有咩好做呢？可以去睇戲，市中心有一間Roxy戲院，當期時係全世界都睇緊「星球大戰」。我都唔執輸，買飛入場啦！小鎮嘅戲院都一樣設備齊全，有小食店、有遊戲機、夾公仔。外國戲院唔興畫位，所以開場前要預留多啲時間排隊入場搵位。

就係咁係Kangaroo Valley同Nowra呢兩個地方hea左一日，聽日又要一早起身開車，要趕去一個營地玩刺激嘅嘢！

- 待續 -

Fleet Air Arm Museum - 489A Albatross Rd., Nowra Hill, Australia, NSW

Perfect Catch Seafood & Takeaway - 480 Princes Hwy, Bomaderry, Australia, NSW

Best Western The Balan Village Motel - Cambewarra Rd, Bomaderry, Australia, NSW

自駕遊 - 澳洲(7) 袋鼠谷

自駕遊 - 澳洲(7) 袋鼠谷

Facebook Page:  http://www.facebook.com/drivingtour

一早離開悉尼市去Fitzroy Falls再跟住去食pie，不過係去Fitzroy Falls途中經過Mittagong嘅Bong Bong Road時候，見到路邊有好多好靚嘅花，當然要落車影下啦！

路邊靚花

沿Mittagong嘅Renwick Dr見到一排排新起嘅house，呢個新社區好寧靜、光害又少，如果住係到夜晚坐出屋外草地就可以好浪漫咁，望住個天數星星啦！

去到Fitzroy Falls泊好車，記住比錢買張泊車飛。由停車場行200米就到展望台，展望台離地640米，唔係好高姐。我咁講係因為之後嘅行程，我有機會企係離地更高嘅地方。

Fitzroy Falls

行完Fitzroy Falls一心準備去Kangaroo Valley Pie Shop食pie，佢話自己係The World’s Best Pie Café。講到咁勁揪，當然要去試下啦！所以開車去嘅時候係幾興奮，一邊開車一邊聽歌，係爽YY。

早班火車去袋鼠谷

最最最唔想出現嘅事情，出現左！去到Pie Shop，佢今日休息。都無辦法啦！只好繼續行程，直接去袋鼠谷食lunch。

No Pie Today

係正式進入袋鼠谷最旺嘅位置之前，會先駛過Hampden Bridge，一條超過100年歷史嘅吊橋。

走過百年大橋

泊好車就好hea咁係袋鼠谷市面行下睇下嘢！影下舊油站，入去古董店睇下。感覺有少少似香港嘅赤柱，咁當然人地地方大好多，環境靚好多，食物好食好多，空氣清新好多，因為呢到係澳洲。

袋鼠谷行街

其中一間係袋鼠谷嘅特色店舖，吸引左我走入去行左一陣。入面所有嘢都係用木做，有日用品有玩具。佢嘅木製玩具係好靚，好精美。你可以買起成間大宅，買傢俬，買電器，買埋屋企人都得。連具停車場同大大隻嘅木馬都有，可惜太大件要帶返香港會有難度呀！

Wood Gallery

Lunch之後就去下一個位於Nowra嘅景點。

- 待續 -

我嘅午餐地點：

Jing Jo Cafe Restaurant, Shop 8/160 Moss Vale Rd、Kangaroo Valley NSW 2577

自駕遊 - 澳洲(6) 全日玩車

自駕遊 - 澳洲(6) 全日玩車

Facebook Page:  http://www.facebook.com/drivingtour

係澳洲睇澳職、睇袋鼠、摸樹熊、去夜店、食好嘢！已經好興奮，但今日更加興奮。因為要去賽車場，駕駛方程式賽車。今次係悉尼，我係去Eastern Creek International Raceway玩。出發前已經上網預約，去到報上姓名同比張香港駕駛執照佢登記就可以。

Anglo Racing Academy http://www.driving-experience.com.au

對於駕駛方程式賽車，我係零經驗。所以開始之前要先聽睇教學影片，同聽教練講解一下。最後就坐上房車係賽道走一圈，教練介紹每一個彎位要注意嘅地方。教練特別提醒高速過彎時慢入快出係絕對必要，同埋呔盤唔可以轉到90度。轉到90度架車就會失控，十分危險。由於同場玩車嘅人，大家都係新手，所以係練習期間，都要係右手邊爬頭。如果係左手邊爬頭會即時取消資格，比左嘅錢都無得退。

準備

上左車就發現個極力子﹝離合器﹞，比起一般跑車﹝我曾經係珠海賽車場玩Honda Civic EK4﹞係重好多好多。開方程式車，我一波地板油已經感覺好快，推背就當然架啦！

走一圈

我玩緊嘅時候，有隻大雀橫越賽道，比佢嚇一嚇添！

大鳥出現

我join左佢個20 Lap Enduro，每次跑十個圈，中間有休息時間。我租埋兩個cam，分別影住車頭同自己，所以可以整到畫中畫影片。事後睇片先知道，原來我碌到個工作人員。

車親人

朝早9點幾玩到下午2點幾，成身都散晒！玩完我攰到要返酒店沖涼同瞓一陣，之後夜晚出去Westfield Parramatta附近嘅Lee Chef Restaurant食個雜錦炸麵做晚餐。

今晚要早啲瞓，聽朝要一早開車向Kangaroo Valley進發。聽日outtown，夜晚竟然做左一件我出發前無plan過要做嘅事，咩事呢？

- 待續 –

自駕遊 - 澳洲(5) 野生動物園

自駕遊 - 澳洲(5) 野生動物園

Facebook Page:  http://www.facebook.com/drivingtour

由Blacktown Market開十分鐘車就到達Featherdale Wildlife Park，係澳洲無土地問題，好多景點都係免費泊車，包括呢一個係西悉尼嘅動物園。入到場第一樣見到嘅動物係紅頸袋鼠，佢地成左年都係好細隻。基本上動物園個圍欄係無作用，佢地夠位穿過去，但又好奇怪佢地唔會走出圍欄。

紅頸袋鼠影片

嚟澳洲要見到大隻嘅袋鼠，好容易。但見同摸袋鼠BB，就係第一次啦！管理員手抱一隻叫Lucy嘅袋鼠BB同大家見面，我周圍嘅人都好興奮，個個都想摸下佢。

摸袋鼠BB影片

呢個park入面嘅袋鼠好鬼free，可以周圍行，同人類零距離接觸。同野外嘅袋鼠最大分別係，佢地食雪榚筒。其實雪榚筒入面係有袋鼠糧，$10(AUD)一杯，入左錢打開個玻璃櫃自己攞。

總有一隻袋鼠係左近影片

另一主角樹熊係呢個park都大受歡迎，要排隊先可以同樹熊影相同摸下。重點係唔駛另外比錢，但如果你去Taronga Zoo就要另外比錢，而且係唔比摸。Featherdale Wildlife Park呢個安排，真係正呀！

排隊摸樹熊

除左樹熊同袋鼠之外，park入面有個Farm Yard，入面有各重家禽，有豬、羊、鵝、雞。係嘅，都係零距離。換轉係香港，一班大白痴又會衝出嚟話污穢呀！有病菌呀！我就唔怕，因為我相信如果要身體有抵抗力，就必須要接觸唔同嘅病菌，等身體產生抗體，咁先會身體健康。

我又一次係Farm Yard見到隱形圍欄嘅威力，一群鴨係到飲水，但睇左好耐佢地都唔會走出個圍欄，哈哈！

家禽零距離及隱形圍欄影片

剛才我提到Farm Yard入面有雞，我就見到一隻好奇怪嘅雞，佢梳左個爆炸頭，身體嘅毛又比較長，又會去咬其他體形比佢細嘅雞，成個大佬咁款。唔知係咩品種。

雞大佬影片

除左以上嘅動物之外，重有火雞、狐狸、企鵝及各種爬蟲類。

個cam受襲影片

澳洲夏天都幾熱下，我見到班企鵝係沙地上面生活，當時覺得佢地好辛苦。後來睇返資料，原來真係有企鵝係沙漠生活，一直以為南極先有企鵝。

沙地上的企鵝

玩人同睇人被玩，可能係人類唔多好嘅天性。動物園其中一個項目係餵狐狸，但就偏偏要隻狐狸跳左好多次先比佢食，大家睇得好開心添。

狐狸被玩影片

玩左成日，返去市區食晚飯先。

- 待續 –