蔡立兒 I am here

《I am here – Cherrie Choi》 近期比呢隻碟吸引住，幾乎日日都要煲。上一次買蔡立兒嘅CD已經係1990年，《Close Your Eyes + 精選十三首》。我同佢年紀差不多，佢出道嘅時候我讀緊中學，唔少男生都好LIKE佢，Close Your Eyes、怎麼…等等歌曲都好hit。

呢隻碟製作一流唔駛多講，我就攞《絕戀》做個對比。今次用鋼琴做伴奏，帶出另外一個感覺，一個少女長大了，歌曲中充滿感慨。我聽嘅時候感覺就係比琴聲擁抱住，被少女的思緒圍繞。分手了但沒有眼淚，一個人拿著酒杯淺嘗。

《絕戀》上一個版本係用結他伴奏，接近民歌味道，畢竟蔡立兒當時都係一個學生，呢個編曲帶出一種學生時期的少女情懷。分手了傷心過哭過，同學死黨總會係身邊支持鼓勵。

十首歌各有特色，整體嚟講呢隻碟係絕對值得買嚟享受。首批CD係由Sony日本原廠壓製，而母帶交由日本著名Master Engineer山崎翼負責。絕對係一流製作，一流感受。

我希望蔡立兒下一張碟，可以考慮翻唱呢幾首歌《怎麼》﹝原唱：蔡立兒﹞、《如此這般的愛情故事》﹝原唱：黎姿﹞及《捉不到的愛》﹝原唱：蔡安蕎﹞。

ONKYO CD PLAYER – C-7030

ONKYO INTEGRATED AMPLIFIER – A-9010

中古Speaker – ENERGY 3.1e (Made in Canada)

自駕遊 - 澳洲(11) 再度重遇你

自駕遊 - 澳洲(11) 再度重遇你

Facebook page: http://www.facebook.com/drivingtour

嚟到旅程最後兩日(2016年1月1及2日)，可以唔駛早起身啦！

睇完煙花倒數之後，餘下嘅節目就係睇一場澳洲職業足球聯賽(A-league)，同探野生袋鼠。場A-league係主場嘅西悉尼流浪者vs阿德萊德聯，好喜歡西流主場嘅氣氛，RBB係絕對Crazy。

入左場之後出現左一個小插曲，原以為自己買左第一排可以好近睇比賽，點知個座位表同實際係有出入，我前面放左好多箱係到，搞到我睇唔到啦！火呀！好彩我後面有空位，可以走過去坐。

 比嘢擋住影片

再度重遇你，我講嘅係探野生袋鼠，呢個係我嚟澳洲嘅must go活動之一。係Morisset Hospital附近有一大片草地同樹林，經常會有袋鼠係到聚集。佢地好友善，摸下或者同佢地合照都好easy。如果有手信帶去就更受歡迎，切左一粒粒嘅蘋果同香蕉都係佢地至愛。

 我和野生袋鼠

( 袋鼠出沒位置： Morisset Hospital, Acacia Ave, Dora Street, Morisset NSW 2264 )

係Morisset Hospital旁邊係一個郊野公園，有一個叫Lake Macquarie嘅湖，Boat Ramp附近有一片草地可以hea，我就泊左架車係到休息下。10日嘅澳洲自駕遊完結啦！期待下一次自駕遊。

Renault Megane係湖邊變身

是日晚餐地點：

Pancakes On The Rocks, 100 Briens Rd, Northmead NSW 2152

是日消夜地點：

Bondi Surf Seafoods, 128 Campbell Parade, Bondi Beach NSW 2026

( 澳洲自駕遊照片 https://www.facebook.com/drivingtour/photos/?tab=album&album_id=1125063837505284 )

自駕遊 - 澳洲(10) 一生起碼睇一次

自駕遊 - 澳洲(10) 一生起碼睇一次

Facebook Page:  http://www.facebook.com/drivingtour

嚟到除夕﹝2015年12月31日﹞係今次澳洲自駕遊嘅重頭節目，為左要係悉尼睇煙花匯演倒數迎接2016年，我係半年前﹝2015年6月﹞已經買定機票同book定酒店，之後就上網睇下參加邊一個倒數活動價錢係比較經濟。

由酒店前往Darling Harbour影片

最後就選擇左坐船去Goat Island睇煙花，票價係每人$195AUD。有來回船係Darling Harbour接載大家去Goat Island，佢有兩個上船時間，要霸靚位就一定要買第一班船啦！

購買前往Goat Island船票網址： http://www.moshtix.com.au

我中午去到Darling Harbour周圍行，坐渡輪穿越悉尼大橋去歌劇院。歌劇院周圍已經人山人海，好多人幾日前已經露宿等待。而任何面向大橋嘅岸邊同海灘都迫滿人，為左睇煙花大家都可以去到好盡。

坐悉尼渡輪影片

每次嚟到澳洲都會係Baskin Robbins雪榚店到食雪榚，唔食唔安樂。可惜香港無啦！最近都要去到台灣先有。

Baskin Robbins影片

到左下午6點鐘，係時候坐船去Goat Island。不過緊張之餘都要注意安全，係船上面有工作人員講解要留意嘅地方，同埋叫大家唔好跑。Goat Island係一個禁區，只會係特別日子對外開放。由於係禁區關係，進入嘅遊客亦限制係800人以內。有人數限制之下，咁大家就可以輕輕鬆鬆睇煙花，唔駛好似Opera House個邊咁擠迫。而且有人帶埋大機去播歌，基本上整個環境都好熱鬧。

坐船去Goat Island影片

悉尼除夕煙花匯演嘅活動安排係好好，活動由下午開始有花式飛行表演、有遊艇巡遊、到晚上9點有提前煙花匯演。每逢電視新聞直播時間，都有直昇機飛近群眾拍攝，大家又會好興奮咁向住直昇機揮手。所以就算你係晨咁早嚟左霸位，都唔會無聊到整日只係玩手提電話。

遊艇巡遊及提前煙花影片

9點煙花warm up左大家之後，係12點59分就開始一分鐘倒數。大家睇住大電視，一齊準備迎接2016年。我前面剛好有一對戀人，佢地好sweet咁睇煙花。放完煙花之後，大家都見到燒著左條橋。哈哈！

悉尼除夕煙花匯演影片

睇完除夕煙花匯演之後，勁多人係街上面，入鐵路站一樣迫滿人。本來以為要幾個鐘頭先返到酒店，但因為秩序良好，我排左一陣已經入到鐵路站，2點鐘已經返到酒店。

人山人海影片

悉尼嘅除夕煙花匯演真係好壯觀，要親臨其中先可以感受到個種興奮，同睇電視嘅感覺差好遠，所以呢一個event絕對係人生必定要參與一次嘅活動。

自駕遊 - 澳洲(9) 離地玩意

自駕遊 - 澳洲(9) 離地玩意

Facebook Page:  http://www.facebook.com/drivingtour

想知道離地嘅咩感覺，就要去Illawarra Fly Treetop Adventures玩下。澳洲最高滑翔索道(Highest Zipline Tour)，離開樹頂35-50米。整個tour由三條索道同兩條吊橋組成，大約1個小時完成。每一關之間會有一個半空嘅等候位置，人企係幾十米半空都幾驚下。

第一關

幾十米半空行吊橋，又係另一個挑戰，但驚還驚我都唔可以行得太慢，唔好阻住係我後面嘅團友。

行吊橋

最緊張係第四關嘅索道，呢個距離最遠，如果唔夠衝力去到終點就要由教練拉過去。臨飛出去前工作人員教路，叫我盡量瞓底啲，咁就可以加快速度。好彩，我都剛好到達終點，唔駛比人拉埋去。

距離最遠

玩完啱啱好中午時間，開車去Kiama食午餐。由Illawarra去Kiama Blowhole只需要30分鐘，但呢30分鐘就將我曬傷啦！鬼咩！貪過癮，開住蓬去Kiama。中午時間，唔曬傷先奇。

縮時攝影

加多少少幻想，我好似開緊多啦A夢時光機。

Kiama Blowhole係一個出名景點，旅行團都會嚟睇。所以整個市面都好多人，要搵地方食嘢都唔係容易。睇Blowhole之餘大家可以沿著石灘一路行去崖邊，石頭都好崎嶇而且無明顯嘅路，都係靠自己亂行出嚟！咁除左blowhole市面上都有其他嘢睇。有畫展，有玩具店，食嘢就有海鮮店。

Kiama Blowhole

其實澳洲每一個小鎮都好值得去細味，今次只有幾個小時係Kiama，希望有機會再嚟啦！

自駕遊 - 澳洲(8) 軍事博物館

自駕遊 - 澳洲(8) 軍事博物館 

Facebook: http://www.facebook.com/drivingtour

開車只需要半個鐘，就由袋鼠谷到達Nowra。嚟到Nowra就要去佢個軍事博物館睇睇，Fleet Air Arm Museum入面主要展覽戰機和直昇機，另外有紀念品店同咖啡店。展館好大而且好少遊客，可以比我一個人慢慢係到睇。

Fleet Air Arm Museum 海軍航空兵博物館 Part 1

Fleet Air Arm Museum 海軍航空兵博物館 Part 2

Fleet Air Arm Museum 海軍航空兵博物館 Part 3

行完博物館肚餓啦！係時候去食晚餐。Perfect Catch Seafood & Takeaway位於Shoalhaven River同Nowra Bridge旁邊，環境都算幾好。我比較喜歡搜尋係社區入面嘅魚市場，因為通常價錢都會比較平，所有我到而家都未去過Sydney市區嘅漁人碼頭。

點左一打生蠔同炸左一條魚，就可以坐係露天地方食啦！係澳洲戶外食海鮮，會有好多人同你爭食，我講嘅人係指海鷗同蒼蠅

食海鮮

係小鎮食完晚飯，有咩好做呢？可以去睇戲，市中心有一間Roxy戲院，當期時係全世界都睇緊「星球大戰」。我都唔執輸，買飛入場啦！小鎮嘅戲院都一樣設備齊全，有小食店、有遊戲機、夾公仔。外國戲院唔興畫位，所以開場前要預留多啲時間排隊入場搵位。

就係咁係Kangaroo Valley同Nowra呢兩個地方hea左一日，聽日又要一早起身開車，要趕去一個營地玩刺激嘅嘢！

- 待續 -

Fleet Air Arm Museum - 489A Albatross Rd., Nowra Hill, Australia, NSW

Perfect Catch Seafood & Takeaway - 480 Princes Hwy, Bomaderry, Australia, NSW

Best Western The Balan Village Motel - Cambewarra Rd, Bomaderry, Australia, NSW

自駕遊 - 澳洲(7) 袋鼠谷

自駕遊 - 澳洲(7) 袋鼠谷

Facebook Page:  http://www.facebook.com/drivingtour

一早離開悉尼市去Fitzroy Falls再跟住去食pie，不過係去Fitzroy Falls途中經過Mittagong嘅Bong Bong Road時候，見到路邊有好多好靚嘅花，當然要落車影下啦！

路邊靚花

沿Mittagong嘅Renwick Dr見到一排排新起嘅house，呢個新社區好寧靜、光害又少，如果住係到夜晚坐出屋外草地就可以好浪漫咁，望住個天數星星啦！

去到Fitzroy Falls泊好車，記住比錢買張泊車飛。由停車場行200米就到展望台，展望台離地640米，唔係好高姐。我咁講係因為之後嘅行程，我有機會企係離地更高嘅地方。

Fitzroy Falls

行完Fitzroy Falls一心準備去Kangaroo Valley Pie Shop食pie，佢話自己係The World’s Best Pie Café。講到咁勁揪，當然要去試下啦！所以開車去嘅時候係幾興奮，一邊開車一邊聽歌，係爽YY。

早班火車去袋鼠谷

最最最唔想出現嘅事情，出現左！去到Pie Shop，佢今日休息。都無辦法啦！只好繼續行程，直接去袋鼠谷食lunch。

No Pie Today

係正式進入袋鼠谷最旺嘅位置之前，會先駛過Hampden Bridge，一條超過100年歷史嘅吊橋。

走過百年大橋

泊好車就好hea咁係袋鼠谷市面行下睇下嘢！影下舊油站，入去古董店睇下。感覺有少少似香港嘅赤柱，咁當然人地地方大好多，環境靚好多，食物好食好多，空氣清新好多，因為呢到係澳洲。

袋鼠谷行街

其中一間係袋鼠谷嘅特色店舖，吸引左我走入去行左一陣。入面所有嘢都係用木做，有日用品有玩具。佢嘅木製玩具係好靚，好精美。你可以買起成間大宅，買傢俬，買電器，買埋屋企人都得。連具停車場同大大隻嘅木馬都有，可惜太大件要帶返香港會有難度呀！

Wood Gallery

Lunch之後就去下一個位於Nowra嘅景點。

- 待續 -

我嘅午餐地點：

Jing Jo Cafe Restaurant, Shop 8/160 Moss Vale Rd、Kangaroo Valley NSW 2577

自駕遊 - 澳洲(6) 全日玩車

自駕遊 - 澳洲(6) 全日玩車

Facebook Page:  http://www.facebook.com/drivingtour

係澳洲睇澳職、睇袋鼠、摸樹熊、去夜店、食好嘢！已經好興奮，但今日更加興奮。因為要去賽車場，駕駛方程式賽車。今次係悉尼，我係去Eastern Creek International Raceway玩。出發前已經上網預約，去到報上姓名同比張香港駕駛執照佢登記就可以。

Anglo Racing Academy http://www.driving-experience.com.au

對於駕駛方程式賽車，我係零經驗。所以開始之前要先聽睇教學影片，同聽教練講解一下。最後就坐上房車係賽道走一圈，教練介紹每一個彎位要注意嘅地方。教練特別提醒高速過彎時慢入快出係絕對必要，同埋呔盤唔可以轉到90度。轉到90度架車就會失控，十分危險。由於同場玩車嘅人，大家都係新手，所以係練習期間，都要係右手邊爬頭。如果係左手邊爬頭會即時取消資格，比左嘅錢都無得退。

準備

上左車就發現個極力子﹝離合器﹞，比起一般跑車﹝我曾經係珠海賽車場玩Honda Civic EK4﹞係重好多好多。開方程式車，我一波地板油已經感覺好快，推背就當然架啦！

走一圈

我玩緊嘅時候，有隻大雀橫越賽道，比佢嚇一嚇添！

大鳥出現

我join左佢個20 Lap Enduro，每次跑十個圈，中間有休息時間。我租埋兩個cam，分別影住車頭同自己，所以可以整到畫中畫影片。事後睇片先知道，原來我碌到個工作人員。

車親人

朝早9點幾玩到下午2點幾，成身都散晒！玩完我攰到要返酒店沖涼同瞓一陣，之後夜晚出去Westfield Parramatta附近嘅Lee Chef Restaurant食個雜錦炸麵做晚餐。

今晚要早啲瞓，聽朝要一早開車向Kangaroo Valley進發。聽日outtown，夜晚竟然做左一件我出發前無plan過要做嘅事，咩事呢？

- 待續 –