唔係自駕遊之吉隆坡跨年旅行(4)

Facebook Page: http://www.facebook.com/drivingtour

食完蛋塔就返酒店旁邊嘅Nu Sentral商場shopping，由於吉隆坡天氣好熱我帶去嘅tee著一日已經濕晒，咁就買幾件tee著下先。係其中一間店，三件tee賣50蚊馬幣。不過要留意係，售貨員好有原則，同場有三條褲賣50蚊馬幣，我朋友想買一條，咁我攞住2件tee、一條褲去比錢。收銀處話NO，三件tee就三件tee，三條褲就三條褲，唔可以mix。

Shopping完返酒店休息一陣又出去食晚餐啦！今晚去黃亞華小食店，我地係酒店用Grab call車，15蚊馬幣坐架日產Teana過去，司機係華人大家可以用廣東話溝通。去到黃亞華小食店，係門外已經見到一條條煎緊嘅魔鬼魚，好想試下。

我地叫左魔鬼魚、大蝦、炒菜、福建麵、串燒同埋燒雞翼。無錯係燒雞翼，佢燒到塊皮脆卜卜，又夠蜜糖味，我覺得好食過自己燒。魔鬼魚嘅肉好結實，同平時係香港食嘅魚好大分別，都好好食。整體服務都好好，啲亞哥亞姐好熱情，上菜速度又快。

馬來西亞旅遊小貼士由Grab司機提供：

如果想係馬來西亞得到好嘅招待，見到華人記住要講廣東話。

食飽就坐鐵路去雙子塔，準備睇今晚嘅除夕煙花。一出KLCC車站，就聽到嘈到拆天嘅喇叭聲。原來馬來西亞嘅民眾係會瘋狂咁吹喇叭，場面好好好熱鬧呀！最後我地係Public Bank大樓外面搵到個位置對住雙子塔，以為好正啦！哈哈！到左開始放煙花嘅時候，先知道原來呢邊係背面嚟。

 有煙花片睇

係有少少失望，不過跟住係放完煙花之後嘅大場面，又令我興奮反。一放完煙花，本來停晒係十字路口嘅電單車，全部一齊起步。成千部電單車係路中心，場面好壯觀。文字形容唔到，去睇片啦！

千部電單車壯觀影片

唔係自駕遊之吉隆坡跨年旅行(3)

Facebook Page: http://www.facebook.com/drivingtour

係ICC Pudu食完lunch就轉到Central Market繼續行繼續食，最近Central Market嘅鐵路站叫Pasar Seni，出左站就會見到Central Market係對面馬路。

Central Market有室內同室外，天氣熱即刻入室內涼下冷氣先，入面有好多小店，當中有一間賣嘅嘢應該係全場獨一無二。呢間店主打貓頭鷹圖案，有好多唔同做形貓頭鷹嘅袋、背囊同飾物，鍾意貓頭鷹嘅朋友唔好錯過。

入得嚟涼冷氣就搵個地方食下嘢啦！係Secret Recipe買左三件蛋糕，分別係Red Velvet Supreme、New York Cheese同埋Chocolate Indulgence。三件都好新鮮好好味，Red Velvet Supreme酸味比較重，New York Cheese嘅芝士味就剛剛好，因為我本身好怕太重芝士味嘅蛋榚，而Chocolate Indulgence就好黏，食一啖會比朱古力醬封喉。

Central Market露天部份，有人話似香港嘅女人街，我就話一啲都唔似。呢到行人位置闊好多又唔會好迫，又有埋上蓋唔怕落雨，戶外無冷氣但人地會整埋風扇周圍吹。反觀香港嘅女人街，可以用嘈、迫、熱嚟形容。

食完西式蛋榚，跟住去食中式蛋榚，就係品泉餅家嘅蛋塔。係Central Market過返對面馬路，穿過Chinatown茨廠街就到達品泉餅家。係Chinatown有一間水果店賣冰凍嘅水果，3蚊港幣一份，我食左件火龍果，又凍又甜又好食，3蚊抵比啦！

行到品泉餅家等左一陣，蛋塔就出爐啦！剛剛出爐嘅蛋塔個個漲卜卜好得意，老板娘話放左入外賣盒之後要打開個蓋，唔好焗住啲蛋塔。原來個外賣盒已經設計好一個透氣位，放好蛋塔之後打開中間個蓋就可以。

品泉餅家嘅蛋塔有傳統味、綠茶味同黑芝麻味，全部都好食，個個都熱辣辣。要食過品泉餅家嘅蛋塔，先算去左Chinatown。

品泉餅家： https://www.facebook.com/bunnchoonmy

唔係自駕遊之吉隆坡跨年旅行(2)

Facebook Page: http://www.facebook.com/drivingtour

一行出酒店，見到外面有多部靚車泊係到。唔係自駕遊，就影下人地嘅車啦！

話時話aloft酒店比我嘅感覺都好好，整體設計走向時尚有格調。地下大堂除左有應節嘅聖誕佈置之外，重有自助充電設備﹝係有鎖防止部電話比人偷走﹞、格仔店及Xbox遊戲機任玩。

酒店有天台酒吧同埋泳池，如果想跑步健身又可以去健身室。

由酒店步行到KL中央車站及Nu Sentral商場唔駛一分鐘，而且全程室內唔怕落雨。即使落雨唔想出去玩，淨係行Nu Sentral都有排行，佢頂層係戲院可以睇場戲。

呢一間4星級酒店，值得推薦。

酒店Aloft Kuala Lumpur Sentral - http://www.aloftkualalumpursentral.com

唔係自駕遊之吉隆坡跨年旅行(1)

2016年12月31日

Facebook Page: http://www.facebook.com/drivingtour

放工趕去機場到我可以瞓落aloft酒店張床係今朝4點，叉幾個鐘頭電就好起身去食午餐。係吉隆坡第一餐飯去左位於ICC Pudu內嘅阿榮哥，整個美食廣場有好多間食店，不過好多人推介阿榮哥咁就去左呢間先啦！

一坐低亞姐已經埋嚟落單，我地叫左三杯海南茶同多士。對於本身好少飲咖啡同奶茶嘅我嚟講，呢杯海南茶又真係好好飲喎！多士又熱又脆，中間夾一塊厚牛油，感覺一流。當然食多士係唔夠飽，圍繞住重有其他食店。叫左一碟炸兩，一碗咖哩麵及一碗龍躉西刀魚丸湯。總之所有食物都好好味啦！

食完起身行入少少，就會見到阿福豬腸粉。豬腸粉係基本食物，可以另外要加其他食物上去，我就加左豆腐、腐竹…。不過佢嘅腸粉唔係香港食慣嘅熱辣辣，所以我就覺得麻麻地好食。

下！3個人午餐食咁少嘢！當然唔係啦！我地之後轉去Central Market同唐人街繼續食。

更多照片： https://www.facebook.com/pg/drivingtour/photos/?tab=album&album_id=1423822947629370

P.S. 係呀！今次唔係自駕遊，自駕遊要等多一陣先。