2015年澳洲自駕遊(十三) – 17/4 Tree Top Crazy Rider
今日天都未光就開車,要係10點半去到Tree Top Adventure Park玩Crazy Rider。由於天氣惡劣預計今朝由Bathurst去到目的地大約要4個小時,主要沿Great
Western Hwy/A32接B59經Chifley Rd. 去到Bell鎮,之後進入彎彎曲曲的山區公路Bells Line of Rd./B59。
( 瀏覽更多精彩照片 )
跑山係最好玩,加上今日又大雨又大霧,呢種情況開車我就最開心,比起風和日麗咁開車好玩好多。睇片就可以見到有幾大霧,最嚴重時我只可以睇到前面幾百米。不過大霧唔代表可以慢慢開車,係公路開車你要睇住後面嘅車,因為開得太慢對係後面衝上嚟嘅車係好危險。( 山上大霧影片 )
跑完山就會回到市區嘅道路,穿過Richmond市再走Pacific Motorway /M1就到達目的地。沿路行車都好順暢,但去到Richmond就遇上返工嘅繁忙時間,加上有道路工程,係呢到塞左半個鐘頭車。上左M1公路之後就開始想瞓覺,又直又闊嘅高速公路真係好悶。
去到目的地無落雨,可以玩Crazy Rider。場地負責人唔比我用自己部Action Cam,所以我就租用佢地部GoPro。出去旅行如果錢可以解決到嘅問題我都唔會太執著,租GoPro就租啦!玩完佢就比返張SD Card我。 ( Crazy Rider影片 )
直到當日下午我到達NewCastle入住酒店之後,開電腦才發現張卡入面無影片,只有一大堆縮時照片。即時聯絡場地負責人交涉,最後佢地願意退回GoPro的租金,但我就損失左一段珍貴嘅影片。
估唔到玩Crazy Rider都幾消耗體力,參加者要各自拿起用嚟滑道嘅器材行上山。玩Xtreme時就要行大約4百米上山,行到上去已經身水身汗。雖然有唔開心嘅地方,但總括嚟講呢個玩意係值得推薦比大家去玩。
另外係個Park入口位置,有好多繩網陣比小朋友玩。附近又有Amazement – Family Fun及Cedar Park Lavendar
Farm,開車一家大細嚟Yarramalong Valley玩係好合適。
離開Tree Top Adventure Park就去海邊食海鮮。