2015年澳洲自駕遊(十四) – 17/4 NewCastle
離開Tree Top Adventure Park就去位於 Tuggerah Lake﹝塘鵝湖﹞旁邊嘅Pelicans Wharf Family
Restaurant食海鮮，選擇去呢到食lunch係因為我想搵一間係可以睇到海嘅地方，好好享受午餐。
( 影片 – 途中遇上澳洲公路巡警，好彩唔係捉我超速。 )
我一個人食唔到太多，所以只係點左一條魚同一盤蝦，可能人在外地心情靚啦！加上開揚嘅環境，我感覺呢一餐好滿足。
餐館我老闆好nice(照片中就是他)，同佢傾左一陣，知道佢準備退休了，而呢間餐館亦會出售。可惜呀！我下一次嚟澳洲嘅時候，未必有機會再可以係Pelicans Wharf Family Restaurant食海鮮了。
塘鵝湖真係好多塘鵝，我食飽之後就係湖邊行下，影下相。食個午餐都可以咁舒服咁寧靜，澳洲實在太美好了。
下午到達入住的Travelodge Newcastle，由呢到開車去Hunter Stadium十分鐘就到。而家距離比賽仲有一段時間，我就去附近嘅Nobbys Beach行下先，個度有一座Nobbys
Lighthouse。由於已經開始入秋天氣比較涼快，所以無咩人係沙灘玩。沿海灘小路可以行到燈塔，夜晚係到拍拖應該很浪漫吧！
晚上去到Hunter Stadium睇澳洲職業足球聯賽(A-league) 紐卡素主場vs悉尼FC，球場旁邊有爛地停車場$8AUD任泊。入場前可以先享受場外嘅表演，今晚有空軍隊員唱歌表演，又有軍犬及滅火軍車展出，小朋友更可以上車坐下。
( 影片 – 空軍音樂表演 )
入到場周圍行下，除左有主隊波衫賣之外，快餐店都好多。我係Golden Churros買左一支嘢試下，食入口感覺似中式甜品"沙翁"，不過係長條型而且有朱古力醬跟埋。而係球場旁邊就係馬場，當晚同一時間有馬車比賽，好多球迷係半場休息時都走去睇下賽馬車。
今晚悉尼擊敗主隊紐卡素，而我可能係唯一一次睇Marc Janko比賽，因為佢5月約滿之後就會離開悉尼FC。
睇完波返到酒店之後就出去玩啦！今晚係Friday Night，Travelodge Newcastle附近有酒吧同賭場等等各式各樣夜店，沿King
St.、Union St. 、Hunter St. 、Devonshire
St.步行就會有發現了，yeah！
- 下一集預告：袋鼠要出場了 -
